Skip to Content
Qui manja gras e pilha-bilha, cada còp son fetge se quilha.

Recèrca per categorias

Categorias
devinhalas
Dètz frairons, en tota sason, passan fòrça temps en preson, e pasmens, causa plan rara, i languisson pas pauc ni pro ni per la lei que los separa e los claus separadament, cinc dins cade compartiment.
Ausissètz aquel crime tant òrre: cada matin, sens pietat, lo fraire tua la sòrre, e puèi, lo ser arribat, a l'ora de s'anar jaire, la sòrre tua lo fraire.
Pindolin pindolava, Gingolin gingolava, Pindolin tombèt, Gingolin l' amassèt.
A lo cap e lo morralh tot coma un caval, a l' esquina e lo moscalh tot coma un caval, a la coeta e lo pendalh tot coma un caval, a los pès e los pesalhs tot coma un caval, e pasmens es pas un caval.
A lo cap d'un ase, a l'esquina d'un ase, a las patas d'un ase, a la coa d'un ase, mas un ase es pas.
Vaca cardina, traucada per l'esquina, molsa pel front, devinha qu'es aquò, luron !
Se me tustan, m'ausisson ; se m'ausisson, arriban ; mas me cali quand son aquí.
Manja pel ventre, caga per l'esquina; endevinha - o, Franquina !
Ai un lençòl que pòdi pas plegar, d' escuts que pòdi pas comptar e una poma que pòdi pas manjar.
Quicòm m'es tombat del cuol, qual sap qué pòt èsser?
Pesa pas dos uòus, e laura pus plond qu 'un parelh de buòus.
Pòrti corona, mas siái pas rei, ai cent femnas malgrat la lei, ai d'esperrons e siái pas cavalièr.
Tanlèu nascut, tanlèu claus; fa cent lègas dins un saut.
Long coma los blats, verd coma los prats, blanc coma lo lach.
Quatre patas sus quatre patas, quatre patas espèran quatre patas, quatre patas venon pas, quatre patas se'n van, quatre patas demòran.
Sèm de la meteissa familha: sèt garçons e pas cap de filha, cadun de nosautres a un nom, cadun morís al cap d'un jorn, mas ressuscita totjorn.
De jorn e de nuèch, amb sas agulhas trabalha ; i vei pas, mas se poncha pas.
Una dòna que coneissètz, vos fugís quand la seguètz, e vos sèc quand la fugissètz.
Camp blanc semenat de negre, tres buòus que butan la relha.
A ni man ni braces ni cap, pasmens, dimenges e setmanas trabalha que degun non sap, amb sas banas.
Cobèrt de pèl siái pas una bèstia, plen de fuèlhas siái pas un arbre, camini pas, mas me fau portar.
Passa per un bartàs, per un camin passariá pas.
Quatre que penjan, quatre que pòrtan, doas que defendon, dos que fan lum, mas tot aquò fa pas qu'un.
Dòna Negreta monta en cadieireta, Monsen Roget li dona lo foet; se Monsen Roget foita tròp, Dòna Negreta li escopís pels pòts.
D'ont mai i n'a d'ont mens pesa, d'ont mens i n'a d'ont mai pesa.
Tot un pòble de domaisèlas, totas plan polidas e bèlas, regassan tota la nuèch, e lo matin se'n van al lièch.
Sèm dos rengs de serventas blancas, al meteis palatz abitam ; un dòna roja al mitan, nos leca lo ventre e las ancas.
Totjorn dedins mas totjorn banhada, gara quand se met a la fenèstra!
Cabironat, recabironat, cap de fustièr i es pas passat.
Negra maire, paire reganhut, mas filhòta polida.
Estira sos braces pr'amor d'i penjar sos mainatges.
D'ont mai i n'a d'ont mens pesa.
D' ont mai la peltiran per la garganta e d' ont mai canta.
A dos parelhs d'alas, mas vòla pas; vòli jogar que devinharàs pas!
Beu son sang e manja sas tripas, sabes qu'es aquò, Monica?
Petaçat, repetaçat, cap d' agulha i es pas passat.
D'ont pus tèunha la veiretz e d'ont mai de paur n'auretz.
Quand a dinnat tot son sadol, se cunha lo nas dins lo cuol.
Assetat sus un soquet, pissa coma un canholet.
Ventre gròs e rebombèl, a las còstasjos la pèl.
Tanlèu conegut e tanlèu fotut.
A cada pas que fa, se pèrd un tròç de coeta.
Quand passèsse lo rei, quitariá pas lo capèl.
De fust, portariá un castèl ; de fèr, pòrta pas un clavèl.
Granda domaisèla, mas pel cap a pas qu'un pel.
Lo trobatz a vòstra pòrta, e pèrdre vos pòt menar.
Ven a caval e s'entorna a pè.
Long long coma cordon, e de dents coma raton.
Quatre domaisèlas per un prat que quand plòu se banhan pas.
La maire de Calicòt a d'òsses, e son filh Calicòt n 'a pas.
Sèm plen lo jorn e vuèges la nuèch, qual sèm?
Doas mòrtas que pòrtan un viu, endevinha qual sèm, Matieu?
Teulat e reteulat, cap de teulièr i es pas passat.
Una gleisòta blanca; quand se dobrís, jamai pus non se tampa.
Quatre cambas lo matin; doas a miègjorn; tres lo ser.
Cinc lauraires, mas pas qu'una rega.
Laurat e relaurat, cap de lauraire i es pas passat.
Quand a dejunat, entremièg las cambas met lo nas.
Siái plen lo jorn e vuèg la nuèch, qual siái ?
Ai pas ni carn ni mai òs, e de la man me'n manca pas un tròç.
Ai un ventre, ai un còl, mas pas ges de cap, qual siái ?
Blanc parpalhonèl que pertot me pausi, sus la mar non ausi.
Son dos fraires, mas se pòdon pas véser.
A la seu òssa sus la pèl; ela es blanca, el rossèl.
Totjorn a córrer e jamai lassa, totjorn a parlar sens saber qué ditz.
Voja son ventre per emplenar lo de son mèstre.
A pas ni coa ni cap, mas fa un nenon plan mannat.
Ai un uèlh al cap de la coeta, sabes qual siái, Malfeta ?
Aquela rumor s'esfòrabandiguèt ni mai un fuòc de rastolh!